ဂျပန် လူဝင်မှုကြီးကြပ်ရေးဌာနသည် မြန်မာနိုင်ငံသားများအတွက် အလုပ်လုပ်ခွင့်ဆိုင်ရာ “နေထိုင်ခွင့် အရည်အချင်းအတည်ပြုလက်မှတ် (Certificate of Eligibility – COE)” ၏ သက်တမ်းကို ယာယီအားဖြင့် ၃ လမှ ၆ လအထိ တိုးမြှင့်ပေးမည်ဖြစ်ကြောင်း ထုတ်ပြန်ထားသည်။
ယခုအစီအစဉ်မှာ မြန်မာနိုင်ငံ အလုပ်သမားဝန်ကြီးဌာန၏ စေလွှတ်ရေးစနစ် ပြုပြင်ပြောင်းလဲမှုများနှင့် မြန်မာနိုင်ငံအလယ်ပိုင်းတွင် ဖြစ်ပွားခဲ့သော ငလျင်ဘေးအပါအဝင် အခြေအနေများကြောင့် “OWIC (Overseas Worker Identification Card)” ထုတ်ပေးမှုများ နှောင့်နှေးနေခြင်းကို ထည့်သွင်းစဉ်းစားကာ ဆောင်ရွက်ခြင်းဖြစ်ကြောင်း သိရသည်။
အဆိုပါအစီအစဉ်အရ မြန်မာနိုင်ငံရှိ ဂျပန်သံရုံးမှ သတ်မှတ်ထားသော ဗီဇာလျှောက်ထားမှုလုပ်ငန်းစဉ်များအတိုင်း ထုတ်ပေးထားသော အကျုံးဝင်ဗီဇာရှိသူများအတွက် အလုပ်လုပ်ခွင့်ဆိုင်ရာ COE များ၏ သက်တမ်းကို ၆ လအထိ အသိအမှတ်ပြုသွားမည်ဖြစ်သည်။
ထို့အပြင် အဆိုပါ နေထိုင်ခွင့်အမျိုးအစားနှင့် ဆက်စပ်သည့် “မိသားစုနေထိုင်ခွင့် (Family Stay)” လည်း အကျုံးဝင်ကြောင်း ဖော်ပြထားသည်။
ဂျပန်အစိုးရဘက်က မြန်မာနိုင်ငံသားများ၏ ဂျပန်ဝင်ရောက်ရေးနှင့် အလုပ်အကိုင်ဆိုင်ရာ လုပ်ငန်းစဉ်များ ထိခိုက်မှုမရှိစေရန် ယာယီအရေးပေါ်အစီအစဉ်အဖြစ် ဆောင်ရွက်နေခြင်းဖြစ်ကြောင်း သိရသည်။
