ဂျပန်တွင် အလုပ်လုပ်နေသော နိုင်ငံခြားသားအလုပ်သမား အရေအတွက်သည် ၂၀၂၅ ခုနှစ်အောက်တိုဘာလအထိ ၂.၆ သန်းကျော်ရှိလာပြီး စံချိန်တင်မြင့်တက်ခဲ့ကြောင်း ဂျပန်ကျန်းမာရေး၊ အလုပ်သမားနှင့် လူမှုဖူလုံရေးဝန်ကြီးဌာန အချက်အလက်များအရ သိရသည်။
Nippon.com ၏ ဖော်ပြချက်အရ နိုင်ငံခြားသားအလုပ်သမား စုစုပေါင်းမှာ ယခင်နှစ်ထက် ၁၁.၇ ရာခိုင်နှုန်း တိုးလာခဲ့ပြီး ၁၃ နှစ်ဆက်တိုက် စံချိန်တင်မြင့်တက်နေခြင်းဖြစ်သည်။ ဂျပန်တွင် လုပ်သားအင်အား လိုအပ်ချက် မြင့်တက်လာခြင်းကြောင့် ကုမ္ပဏီများက နိုင်ငံခြားသားအလုပ်သမား ခန့်အပ်မှုကို ပိုမိုတိုးချဲ့လာနေကြောင်း ဖော်ပြထားသည်။
နိုင်ငံအလိုက် ကြည့်ရှုရာတွင် ဗီယက်နမ်နိုင်ငံသားများသည် အများဆုံးဖြစ်ပြီး လူဦးရေ ၆၁၀,၀၀၀ ခန့်ရှိကြောင်း သိရသည်။ ထို့နောက် တရုတ်နှင့် ဖိလစ်ပိုင်နိုင်ငံသားများ လိုက်ပါလာသည်။
တိုးတက်နှုန်းအမြင့်ဆုံး နိုင်ငံများထဲတွင် မြန်မာနိုင်ငံသားများမှာ ၄၂.၅ ရာခိုင်နှုန်း တိုးလာခဲ့ပြီး၊ အင်ဒိုနီးရှားနှင့် သီရိလင်္ကာနိုင်ငံသားများလည်း သိသာစွာ တိုးလာခဲ့ကြောင်း ဖော်ပြထားသည်။
အလုပ်အမျိုးအစားအလိုက် ကြည့်လျှင် စက်မှုထုတ်လုပ်ရေးကဏ္ဍတွင် နိုင်ငံခြားသားအလုပ်သမား အများဆုံးလုပ်ကိုင်နေပြီး၊ ဝန်ဆောင်မှုလုပ်ငန်းနှင့် လက်လီ/လက်ကားရောင်းဝယ်ရေး ကဏ္ဍများတွင်လည်း အများအပြား အလုပ်လုပ်ကိုင်နေကြောင်း သိရသည်။
နိုင်ငံခြားသားအလုပ်သမားများ၏ အများစုမှာ တိုကျို၊ အိုင်ချီနှင့် အိုဆာကာတို့ကဲ့သို့ မြို့ကြီးများတွင် စုစည်းနေကြောင်းလည်း ဖော်ပြထားသည်။
ဂျပန်တွင် နေထိုင်ပြီး အလုပ်လုပ်နေသော မြန်မာနိုင်ငံသားများအတွက် အလုပ်အကိုင်အခွင့်အလမ်းများ ဆက်လက်တိုးလာနိုင်ကြောင်း ပြသနေသည်။ အထူးသဖြင့် Tokutei Ginou (SSW) ၊ စက်ရုံ၊ စားသောက်ဆိုင်၊ Kaigo နှင့် ဆောက်လုပ်ရေးကဏ္ဍများတွင် နိုင်ငံခြားသားအလုပ်သမားလိုအပ်ချက် မြင့်တက်နေဆဲဖြစ်သည်။
