ဂျပန်တွင် ၂၀၂၅ ခုနှစ်အတွင်း တစ်ဦးတည်းနေထိုင်ရင်း သေဆုံးခဲ့သူများအနက် လူပေါင်း ၂၂,၀၀၀ ကျော်၏ ရုပ်အလောင်းများကို သေဆုံးပြီး တစ်ပတ်ကျော်အကြာမှ တွေ့ရှိခဲ့ကြောင်း ဂျပန်အစိုးရအဖွဲ့ဝင်ရုံး (Cabinet Office) က ထုတ်ပြန်သည့် အချက်အလက်များအရ သိရသည်။
ဂျပန်ရဲတပ်ဖွဲ့က ၂၀၂၅ ခုနှစ်အတွင်း ကိုင်တွယ်ခဲ့သည့် သေဆုံးမှုစုစုပေါင်း ၂၀၄,၅၆၂ မှုအနက် ၇၆,၉၄၁ မှုမှာ “孤独死 (Kodokushi)” ဟုခေါ်သည့် တစ်ဦးတည်းနေထိုင်ရင်း အိမ်တွင် သေဆုံးခဲ့သည့် အမှုများဖြစ်ကြောင်း ဖော်ပြထားသည်။
ထိုအမှုများအနက် လူပေါင်း ၂၂,၂၂၂ ဦးခန့်မှာ သေဆုံးပြီး အနည်းဆုံး ၈ ရက်ကျော်ကြာမှ တွေ့ရှိခဲ့သည့် “孤立死 (Koritsushi)” အမျိုးအစားဖြစ်ကြောင်း သိရသည်။ ထို့အပြင် ၇,၁၄၈ မှုတွင် သေဆုံးပြီး တစ်လကျော်အကြာမှ ရုပ်အလောင်းကို တွေ့ရှိခဲ့ကြောင်း ဖော်ပြထားသည်။
အသက်အရွယ်အလိုက် ကြည့်ရှုရာတွင် အသက် ၈၅ နှစ်နှင့်အထက် လူကြီးပိုင်းများတွင် အများဆုံးဖြစ်ပွားခဲ့ပြီး၊ ၆၅ နှစ်အထက် သေဆုံးမှုစုစုပေါင်းမှာ ၅၈,၉၁၉ ဦးရှိကာ တစ်ဦးတည်းသေဆုံးမှုများ၏ ၈၀ ရာခိုင်နှုန်းနီးပါး ရှိကြောင်း သိရသည်။
တစ်ပတ်ကျော်ကြာမှ တွေ့ရှိခဲ့သည့် isolated deaths များတွင် အသက် ၇၀ ကျော်အမျိုးသားများ အများဆုံးပါဝင်နေပြီး၊ အမျိုးသားများ၏ အရေအတွက်မှာ အမျိုးသမီးများထက် လေးဆနီးပါး များပြားကြောင်းလည်း အချက်အလက်များတွင် ဖော်ပြထားသည်။
ဂျပန်တွင် အိမ်ထောင်မပြုသူများ တိုးလာခြင်း၊ လူဦးရေအိုမင်းလာခြင်းနှင့် တစ်ဦးတည်းနေထိုင်သည့် အိမ်ထောင်စုများ မြင့်တက်လာခြင်းတို့သည် လူမှုအထီးကျန်မှု ပြဿနာကို ပိုမိုပြင်းထန်စေသည့် အကြောင်းရင်းများအဖြစ် သုံးသပ်ထားသည်။
ဂျပန်တွင် နေထိုင်နေသော နိုင်ငံခြားသားများအတွက်လည်း လူမှုဆက်ဆံရေးနှင့် နေ့စဉ်ဆက်သွယ်မှုများ ထိန်းသိမ်းထားရန် အရေးကြီးလာနေသည်။ အထူးသဖြင့် တစ်ဦးတည်းနေထိုင်သည့် အလုပ်သမားများနှင့် အသက်ကြီးလာသော နိုင်ငံခြားသားနေထိုင်သူများအတွက် အရေးပေါ်အခြေအနေများတွင် ဆက်သွယ်နိုင်မည့် မိတ်ဆွေ၊ အလုပ်ရှင် သို့မဟုတ် ဒေသခံအဖွဲ့အစည်းများနှင့် ချိတ်ဆက်ထားရန် လိုအပ်လာနိုင်ကြောင်း သုံးသပ်ထားသည်။
