အတိုးနှုန်းတက်လာမှုကြောင့် အိမ်ချေးငွေပြန်ဆပ်ရမည့်ပမာဏ မြင့်တက်နိုင်

ဂျပန်တွင် အတိုးနှုန်းများ တဖြည်းဖြည်း မြင့်တက်လာနိုင်ကြောင်း ခန့်မှန်းထားပြီး၊ အိမ်ဝယ်ယူရန် Housing Loan ယူထားသူများအတွက် ငွေကြေးဖိအား ပိုမိုများလာနိုင်ကြောင်း ဂျပန်မီဒီယာများက ဖော်ပြထားသည်။

အထူးသဖြင့် တိုကျိုကဲ့သို့ မြို့ကြီးများတွင် အိမ်နှင့် ကွန်ဒိုဈေးနှုန်းများ မြင့်တက်လာနေသဖြင့် လူငယ်အလုပ်သမားများနှင့် မိသားစုအသစ်များသည် ချေးငွေကာလကို နှစ်ရှည်ထားပြီး ဝယ်ယူလာကြသည်။

သို့သော် လစဉ်ပြန်ဆပ်ငွေကို လျှော့ချနိုင်သော်လည်း၊ ပြန်ဆပ်ကာလရှည်လာခြင်းနှင့် အတိုးနှုန်းမြင့်လာခြင်းကြောင့် စုစုပေါင်းပြန်ဆပ်ရမည့်ငွေမှာ သိသိသာသာ တိုးလာနိုင်သည်။

ဂျပန်မီဒီယာ၏ ဥပမာတစ်ခုအရ ယန်း ၇၀ သန်း Housing Loan ကို အတိုး ၃% ဖြင့် နှစ် ၃၀ ချေးယူပါက၊ အတိုး ၄% နှင့် နှစ် ၅၀ ပြန်ဆပ်စနစ်သို့ ပြောင်းလဲသွားပါက စုစုပေါင်းပြန်ဆပ်ငွေမှာ ယန်း ၇၀ သန်းခန့် ထပ်တိုးလာနိုင်ကြောင်း ဖော်ပြထားသည်။

ထို့ပြင် ဂျပန်ဗဟိုဘဏ် (日銀) ၏ မူဝါဒအတိုးနှုန်းသည် လက်ရှိ 0.75% တွင် ရှိနေသော်လည်း၊ ငွေဖောင်းပွမှု (Inflation) ပြန်လည်မြင့်တက်လာနိုင်သည့်အခြေအနေများကြောင့် နောင်တွင် ထပ်မံတိုးမြှင့်နိုင်ကြောင်း စီးပွားရေးပညာရှင်များက ခန့်မှန်းထားသည်။

အတိုးနှုန်းမြင့်လာပါက Variable Rate Housing Loan ယူထားသူများ၏ လစဉ်ပြန်ဆပ်ငွေများလည်း တိုးလာနိုင်သည်။ ထို့အပြင် အိမ်စရိတ်များ မြင့်လာခြင်းကြောင့် အစားအသောက်၊ ပညာရေး၊ ခရီးသွားခြင်းနှင့် အပန်းဖြေစရိတ်များကို လျှော့ချရနိုင်ကြောင်းလည်း သုံးသပ်ထားသည်။

တစ်ဖက်တွင် ဂျပန်အစိုးရ၏ Housing Loan Tax Reduction စနစ်များ ရှိနေသော်လည်း၊ ဝင်ငွေနှင့် အနာဂတ်အသုံးစရိတ်များကို သေချာတွက်ချက်ပြီးမှ Housing Loan ယူသင့်ကြောင်း ကျွမ်းကျင်သူများက အကြံပြုထားသည်။

ဂျပန်တွင် နေထိုင်သည့် မြန်မာနိုင်ငံသားများအနေနှင့် အိမ်ဝယ်ယူရန် စဉ်းစားနေပါက အတိုးနှုန်းပြောင်းလဲမှုနှင့် ချေးငွေကာလကို သေချာစွာ စီစဉ်ရန် အရေးကြီးလာနိုင်သည်။

အထူးသဖြင့် Variable Rate Housing Loan ယူထားသူများသည် လစဉ်ပြန်ဆပ်ငွေ တိုးလာနိုင်သဖြင့် မိသားစုအသုံးစရိတ်နှင့် အနာဂတ်ဝင်ငွေအခြေအနေကို ကြိုတင်တွက်ချက်ထားသင့်သည်။