ဂျပန်တွင် နိုင်ငံခြားသားပိုင် စားသောက်ဆိုင်များ ပိတ်သိမ်းမှုများလာ၊ ဗီဇာစည်းမျဉ်းတင်းကျပ်မှုကြောင့် အခက်ကြုံ
ဂျပန်နိုင်ငံတွင် ဟောင်ကောင်အစားအစာ၊ သီရိလင်္ကာအစားအစာနှင့် အခြားနိုင်ငံခြားအစားအစာဆိုင်များကို ဖွင့်လှစ်လုပ်ကိုင်နေသော နိုင်ငံခြားသားပိုင် စားသောက်ဆိုင်များ ပိတ်သိမ်းမှုများ တိုးလာနေကြောင်း ဂျပန်မီဒီယာများက ဖော်ပြထားပါတယ်။
အဓိကအကြောင်းရင်းမှာ “Management / Business Visa” ဟုခေါ်သော စီးပွားရေးလုပ်ငန်းဗီဇာ စည်းမျဉ်းများ ပိုမိုတင်းကျပ်လာခြင်းဖြစ်ပါတယ်။
ယခင်က နိုင်ငံခြားသားတစ်ဦး စားသောက်ဆိုင်ဖွင့်ရန်အတွက် အရင်းအနှီး ယန်း ၅ သန်းရှိရုံ သို့မဟုတ် ဂျပန်နိုင်ငံသားဝန်ထမ်း ၂ ဦးခန့်ထားရုံဖြင့် လုံလောက်ခဲ့ပေမယ့် ၂၀၂၅ ခုနှစ် အောက်တိုဘာလနောက်ပိုင်းတွင် အရင်းအနှီး ယန်း ၃၀ သန်းနှင့် ဝန်ထမ်းအနည်းဆုံး ၁ ဦးရှိရမည်ဟု စည်းမျဉ်းများ ပြောင်းလဲတင်းကျပ်လာခဲ့ပါတယ်။
ဂျပန်အစိုးရဘက်ကတော့ Paper Company ဟုခေါ်သော စာရွက်ပေါ်သာရှိသည့် ကုမ္ပဏီများကို အသုံးပြုပြီး ဗီဇာရယူမှုများနှင့် ဂျပန်၏ လူမှုဖူလုံရေးစနစ်များကို မသင့်လျော်စွာ အသုံးပြုမှုများရှိလာခြင်းကြောင့် ယခုလို စစ်ဆေးမှုများ တင်းကျပ်လာရခြင်းဖြစ်ကြောင်း ရှင်းပြထားပါတယ်။
သို့သော် အမှန်တကယ် စားသောက်ဆိုင်လုပ်ငန်း လုပ်ကိုင်နေသော နိုင်ငံခြားသားများအတွက် ယန်း ၃၀ သန်းအထိ အရင်းအနှီးတိုးမြှင့်ရန်မှာ လွယ်ကူခြင်းမရှိဘဲ ဝန်ထမ်းရှာဖွေရန်လည်း ခက်ခဲလာနေပါတယ်။
တိုကျိုနှင့် Tochigi ဒေသများရှိ နိုင်ငံခြားသားပိုင် စားသောက်ဆိုင်အချို့မှာ လိုအပ်သည့် အရင်းအနှီးနှင့် ဝန်ထမ်းအခြေအနေ မပြည့်မီနိုင်သောကြောင့် ဆိုင်ပိတ်သိမ်းခဲ့ရပြီး အချို့ပိုင်ရှင်များမှာ ဗီဇာမရရှိသဖြင့် ဂျပန်မှ ပြန်လည်ထွက်ခွာရမည့်အခြေအနေအထိ ရောက်ရှိနေကြောင်း သိရပါတယ်။
ဂျပန်တွင် မြန်မာနိုင်ငံသားများစွာသည် စားသောက်ဆိုင်လုပ်ငန်းနှင့် Food Service sector တွင် အလုပ်လုပ်နေကြပါတယ်။ အခုလို ဗီဇာစည်းမျဉ်းများ တင်းကျပ်လာခြင်းကြောင့် အနာဂတ်တွင် စီးပွားရေးဗီဇာဖြင့် ဆိုင်ဖွင့်လိုသူများ၊ Restaurant business လုပ်လိုသူများအတွက် အခက်အခဲများ ပိုများလာနိုင်ပါတယ်။
